Epidemiya

Bilinməyən ölümcül bir virus Moskvanı qısa müddətdə xarabazara çevirir, şəhərdə elektrik enerjisi kəsilir və pullar dəyərini itirir. Hələlik xəstəliyə yoluxmayan insanlar ərzaq və yanacaq tapmaq üçün bir-biri ilə amansız mübarizəyə başlayır. Şəhərdən kənarda yeni sevgilisi və onun autizm sindromlu oğlu ilə yaşayan Sergey isə nifrətinə baxmayaraq, keçmiş həyat yoldaşını və oğlunu təhlükə içində qoymamaq qərarına gəlir.

Ailəsini paytaxtdan çıxarmağı bacaran Sergeyin karvanına sonradan atası və arsız qonşuları da qoşulur. Adi həyatda bir araya gəlməyəcək bu narahat insanlar köhnə inciklikləri kənara qoymaq məcburiyyətində qalırlar. Onlar həyatda qalmaq üçün Kareliyanın kimsəsiz göl adasında yerləşən tənha ovçu komasına doğru təhlükəli bir səfərə çıxırlar.

Rusiyanın «Epidemiya» adlı fantastik triller serialı 2019-cu ildə işıq üzü görüb və layihə 2 mövsümdən ibarətdir. Ekran əsərinin rejissorluğunu Pavel Kostomarov və Dmitri Tyurin həyata keçirib, baş rolları isə Kirill Kyaro, Viktoriya İsakova, Maryana Spivak və Yuri Kuznetsov canlandırıb.