Əgər məni bağışlasan

Yeddi il əvvəl həyat yoldaşı Valerinin ölümündən sonra Yelena bütün var-dövlətini və ailə biznesini itirmişdi. O, təkbaşına oğlu Boqdanın xəstəliyinə qalib gəldi, yığılan borcları bağladı və Stepanla ailə quraraq yeni bir həyata başladı. Qızı Olesyanın toy ərəfəsində isə bütün ailə gözlənilməz bir hadisə ilə üz-üzə qalır.

İllərdir dünyasını dəyişmiş hesab edilən Valeri qəfil peyda olur. O bildirir ki, ailəsini qorumaq məqsədilə ölümünü saxtalaşdırmaq məcburiyyətində qalıb. Onun qayıdışı ilə digər ailə üzvlərinin də gizli saxladığı sirlər bir-bir üzə çıxmağa başlayır.

Ukrayna istehsalı olan «Əgər məni bağışlasan» («Якщо ти мене пробачиш») adlı dram serialı 2019-cu ildə işıq üzü görüb. Rejissor Oleksiy Qusevin çəkdiyi layihədə baş rolları Olha Hrişına, Aleksandr Paşkov, Aleksandr Konstantinov və Anastasiya Tsımbalaru canlandırıb.