Aldadılmış

Saumya Verma televiziya sahəsində ssenarist kimi uğur qazanmaq və evləndikdən sonra belə maddi cəhətdən heç kəsdən asılı olmamaq arzusundadır. Tezliklə o, böyük media şirkətinə rəhbərlik edən nüfuzlu prodüser Armaan Oberoy ilə tanış olur. Qadın hüquqlarını müdafiə etdiyini iddia edən və Saumyanın karyerasına dəstək verəcəyini vəd edən Armaan onun etibarını qazanır və cütlük evlənir.

Lakin toydan sonra həqiqət üzə çıxır və kişinin maskası düşür. Ailədə üstünlük qurmaq istəyən Armaan əslində patriarxal düşüncəli bir manipulyatordur. O, həyat yoldaşının peşəkar yüksəlişinə kömək etmək əvəzinə, onu tamamilə özünə tabe etdirməyə və adi evdar qadına çevirməyə çalışır.

Hindistan istehsalı olan «Aldadılmış» (Mose Chhal Kiye Jaaye) dram serialı 2022-ci ildə işıq üzü görüb. Layihənin rejissor kürsüsündə Ashish Singh və Vikram Labhe əyləşib. Əsas obrazları Vijayendra Kumeria, Avantika Hundal, Alka Kaushal və Gunn Kansara canlandırıblar.