Katerina

Mədəniyyət məktəbini bitirən Katerina Şvets Çerkası vilayətində yerləşən doğma Şulyaki kəndinə qayıdır. Qızın atası yerli məktəbin direktoru, anası isə dil və ədəbiyyat müəllimidir. Valideynləri ümid edir ki, qızları kənddə qalıb sinif yoldaşı Nikolay Romanenko ilə ailə quracaq, lakin Katerina tamam fərqli bir həyat arzulayır.

Kənddə tarixi bir layihənin çəkilişləri başlayanda gənc qızın planları kökündən dəyişir. Katerinanın çoxdandır ekranlardan heyran olduğu tanınmış aktyor Aleksey Krasilnikov çəkiliş heyəti ilə birlikdə kəndə gəlir. Məşhur aktyorun onunla sadəcə əyləncə xatirinə qurduğu münasibət ailənin və Nikolayın qəzəbinə səbəb olur. Hamilə qalan Katerina sevgisinin ardınca Kiyevə yollanır və böyük şəhərin soyuq, amansız reallıqları ilə qarşılaşır.

Ukrayna istehsalı olan «Katerina» dram serialı 2016-cı ildə ekranlara çıxıb. Layihənin rejissoru Aleksandr Timenkodur. Baş rolları Valeriya Xodos, Dmitri Sova, Mark Drobot və Natalya Sumskaya canlandırıb.