Sevimli manqaka

Seiichiro Karibe gizli qadın təxəllüsü ilə populyar romantik manqalar yaradan, insanlardan uzaq durmağa çalışan bir rəssamdır. Kiçik qardaşının vəfatından sonra o, kimsəsiz qalan qardaşı oğlunu himayəsinə götürmək məcburiyyətində qalır. Dəfn mərasimində Seiichiro mərhumun vaxtilə ilk məktəb sevgisi olmuş Aiko Kuon ilə qarşılaşır. Mərasimdə baş verən uğursuz hadisə nəticəsində gənc qadın işini və qazancını itirir.

Öz növbəsində yeni süjetlər üçün ilham tapa bilməyən rəssam çətin vəziyyətdə qalan Aikoya qeyri-adi bir təklif irəli sürür. O, qadına saxta romantik görüşlərə getməyi və bu görüşlərdəki şəxsi təcrübələrini manqa hekayələri üçün material kimi bölüşməyi tapşırır. Maddi ehtiyac içində olan Aiko bu qəribə sınağa razılıq verir.

Yaponiya istehsalı olan «Love Cartoonist» serialı 2021-ci ildə ekranlara çıxıb. Romantik melodram və komediya janrında olan layihənin rejissor kürsüsündə Junichi Ishikawa ilə Masato Fuchigami əyləşib, əsas obrazları isə Ryohei Suzuki, Riho Yoshioka, Ryusei Iwata və Ryo Ryusei canlandırıb.