Qarğaların sümükləri

Kri xalqından olan istedadlı Alin Spirs musiqi duyumu ilə seçilir və Kanadada doğmalarının əhatəsində böyüyür. Lakin onun dinc uşaqlığı kədərli şəkildə yarımçıq qalır. Qızı bacı və qardaşları ilə birlikdə ailəsindən zorla ayıraraq yerli xalqlar üçün nəzərdə tutulmuş qapalı internat məktəbinə yerləşdirirlər. Burada uşaqlar amansız rəftar, təzyiqlər və öz mədəniyyətlərinin məhv edilməsi siyasəti ilə qarşılaşırlar.

İnternatın ağır sınaqlarından keçən Alin yetkin yaşlarında İkinci Dünya müharibəsi zamanı Kanada Hərbi Hava Qüvvələrində xidmətə yollanır. O, ana dilindən istifadə edərək şifrələyici kimi fəaliyyət göstərir. Müharibənin gətirdiyi çətinliklər həm Alini, həm də onun piyada qoşunlarında vuruşan həyat yoldaşı Adamı keçmişin sağalmayan yaraları ilə yenidən üz-üzə qoyur.

«Bones of Crows: The Series» adlı dram serialı 2023-cü ildə Kanadada istehsal olunub. Ekran əsərinin rejissoru Mari Klementsdir. Əsas rolları Qreys Dav, Fillip Levitski, Karin Vanass və Patrik Qərrou canlandırıb.