Məhəbbət bədirlənmiş ayı

Rio-de-Janeyro sakini Jenuina Miranda on beş ildir ki, İspaniyadan gələn təyyarələri qarşılayır və sərnişinlərin arasında itkin düşmüş əri Dieqonu axtarır. Ötən illər ərzində böyüyən övladları Rodriqo və Mersedes atalarını heç xatırlamırlar. Bazarda satıcılıq edən Jenuina isə xeyirxahlığı və fədakarlığı sayəsində bütün məhəllənin sevimlisinə çevrilib.

Ana övladları üçün hər şeyə dözsə də, gənclər onun yoxsulluğundan və sadəlövhlüyündən zəngin tanışlarının yanında utanırlar. Övladlar eqoizmi və dəbdəbə meylini cazibədar avantürist, qumarbaz ataları Dieqodan miras alıblar. Hekayənin digər tərəfində isə reklam agentliyinin sahibi Konrado, xanımı Lais və övladları Auqusto, İzabela və Patrisiyadan ibarət varlı Souto Maya ailəsi yer alır.

Braziliya istehsalı olan «Lua Cheia de Amor» serialı 1990-cı ildə ekranlara çıxıb və melodram janrında çəkilib. Layihənin rejissorluğunu Mario Marsio Bandarra və Flaviu Kolatrellu ml. həyata keçiriblər. Baş rolları Arildo Agla, Maurisio Mattar, Cerson Brener və Klaudio Korrea i Kastro canlandırıblar.