Xəzər 24

Polina Korolyova Həştərxanda qubernator televiziya kanalının qurulması üçün elan edilən tenderdə qalib gəlir. Əzmli qadın arzularını reallaşdırmaq və yeni formalaşan medianı kənar maraqlardan qorumaq üçün bütün gücünü səfərbər edir. O, televiziyanın fəaliyyət prinsiplərini qorumaq naminə təzyiqlərə boyun əyməməyə çalışır.

İş prosesi zamanı Polina yerli əhalinin etibarsızlığı və güzəştə getmək istəməyən televiziya işçilərinin inadkarlığı ilə üzləşir. Peşəkar çətinliklərlə yanaşı, onun şəxsi həyatında da həllini gözləyən problemlər yaranır. Bütün maneələrə baxmayaraq, o, televiziyanı bütün sevincləri və kədərləri ilə bərabər həyatının ayrılmaz parçası kimi qəbul edir.

«Xəzər 24» («Kaspiy 24») dram serialı 2017-ci ildə Rusiyada istehsal olunub. Ekran əsərinin quruluşçu rejissoru və eyni zamanda rollardan birinin ifaçısı Aleksandr Franskeviç-Layyedir. Baş rolu Anastasiya Zavorotnyuk canlandırıb, layihədə həmçinin Sergey Yuşkeviç və Dmitri Astraxan yer alıb.