Təsir oyunları

Fransız fermeri Mişel Vilnyöv sahədə işləyərkən huşunu itirir və tezliklə ona leykemiya diaqnozu qoyulur. Xəstəliyin səbəbi isə nəhəng aqrokimya şirkəti "Saskia" tərəfindən istehsal olunan təhlükəli pestisiddir. Fermerin uşaqlıq dostu, millət vəkili Qiyom Delpyer zərərli kimyəvi maddənin qanunla qadağan edilməsi üçün mübarizəyə başlayır.

Korporasiya rəhbərliyi isə qanun layihəsini dayandırmaq məqsədilə amansız lobbiçi Matyo Boumanı işə cəlb edir. Çox keçmədən "Saskia"nın marketinq direktorunun meyiti Sena çayından tapılır və hadisələr daha da qarışır. Mərhumun qızı ilə şirkətin maraqlarını müdafiə etmək üçün dəvət olunmuş jurnalist bu müəmmalı ölümün arxasındakı həqiqətləri araşdırmağa qərar verirlər.

2018-ci il istehsalı olan "Təsir oyunları" (Jeux d'influence) dram və triller janrında çəkilmiş Fransa serialıdır. Ekran əsərinin quruluşçu rejissoru Jan-Ksavye de Lestrad olub. Baş rolları Aliks Puason, Loran Stoker, Jan-Fransua Sivadye və Pyer Perye canlandırıblar.