Səninlə olmaq

Lin Vey Lin firavan bir ailədə böyüsə də, atasının qəfil ölümü hər şeyi alt-üst edir. Ağır günlərdə ona dayaq olan şəxslər atasının köhnə dostu və bir vaxtlar sevdiyi Hu Tsyan Yü olur. Çox keçmir ki, arxalandığı bu insanların əsl siması üzə çıxır: ailəyə xəyanət edən məhz onlar olur və şirkətin idarəsini ələ keçirirlər.

Var-dövlətindən məhrum qalan və təhlükə ilə üzləşən gənc qadın ölkəni tərk etməyə məcbur olur. İllər sonra o, itirdiyi ədaləti bərpa etmək və xainlərdən intiqam almaq məqsədilə geri qayıdır. «Bu de bu ai» serialı qəhrəmanın bu çətin mübarizəsindən bəhs edir.

Çin istehsalı olan melodram janrlı serialın rejissoru Nq Qam-Yüendir. Əsas obrazları Uilber Pan, Süy Lu, Denni Xuan və Mao Syaotun canlandırıb. Layihə 2017-ci ildə işıq üzü görüb.