1994

İtaliyada köhnə dövlət nizamı süqut edir və ölkə «İkinci respublika» adlanan yeni bir mərhələyə qədəm qoyur. Media maqnatı Silvio Berluskoni seçki kampaniyasına qoşularaq baş nazir postunu qazanır. Bu siyasi zəfərin pərdəarxasında isə hakimiyyət daxilində mövqe tutmaq istəyən müxtəlif fiqurlar dayanır.

«1994» dram serialı dəyişikliklər fonunda bir neçə qəhrəmanın sonrakı addımlarını əks etdirir. Berluskoninin uğurunda payı olan siyasi texnoloq Leonardo Notte gücünü qorumağa və sistemdə öz yerini tapmağa çalışır. Keçmiş televiziya ulduzu Veronika Kastello parlament üzvü kimi fəaliyyətə başlayır, populist Pyetro Bosko isə Romanın rəsmi dairələrinə uyğunlaşmağa cəhd edir.

İtaliya və Almaniya istehsalı olan bu dramatik layihə 2019-cu ildə işıq üzü görüb. Serialın rejissorları Cuzeppe Qalyardi və Klaudio Noçedir. Əsas rolları Stefano Akkorsi, Quido Kaprino, Miriam Leone və Paolo Pyerobon canlandırıb.