Xəyallar evi

Birinci Dünya müharibəsi veteranı olan yəhudi əsilli iş adamı Artur Qrünberq Berlinin ən yoxsul məhəlləsində Almaniyanın ilk kreditli univermağını açmağı hədəfləyir. O, aztəminatlı insanların da arzuladıqları əşyaları ucuz qiymətə əldə edə bilməsini istəyir. Lakin bu təşəbbüsün reallaşması yolunda ciddi maliyyə çatışmazlığı və ölkədə güclənən nasizm dalğası dayanır.

İş həyatındakı maneələrlə yanaşı, Artur və həyat yoldaşı Alisa şəxsi problemlərlə də üzləşir. Cütlüyün oğlu Harri valideynlərinin gözləntilərindən tamamilə fərqli bir yol seçib. O, ailə ticarətinə qoşulmaq əvəzinə, gecələr Berlinin müxtəlif əyləncə məkanlarında piano ifaçısı kimi çalışmağa üstünlük verir.

Almaniya istehsalı olan «Das Haus der Träume» dram serialı 2022-ci ildə ekranlara çıxıb. Rejissor kürsüsündə Umut Dağ və Şerri Horman əyləşiblər. Əsas rolları Naemi Florez, Lüdviq Zimon, Aleksandr Şer və Nina Kuntsendorf canlandırıblar.