Collar de Esmeraldas

Uzun illər İtaliyada dekorator kimi fəaliyyət göstərən Martin Rivera atasının qəbrinin açılacağını öyrəndikdən sonra təcili şəkildə Argentinaya dönür. Vətənə qayıdan Martin mərhum atası Alfredonun əslində gizli bir həyat sürdüyünü və ədalətsizliklərə qarşı tərəfdaşları ilə birgə mübarizə apardığını anlayır. Eyni ərəfədə böhran səbəbindən yoxsullaşan Romina Françini ailəsini dolandırmaq üçün küçələrdə karton toplayır. Onun atası Luis isə vaxtilə Alfredonun ən yaxın sirdaşı olub və lənətləndiyi deyilən xüsusi bir boyunbağını qoruyub saxlayıb.

Luis əmanəti sahibinin oğluna təhvil vermək istəyəndə naməlum şəxslərin hücumu baş verir. Qoca Luis qətlə yetirilir, huşunu itirən Martinin əlinə isə tapança qoyularaq cinayət onun üzərinə atılır. Hadisə yerinə gələn Romina atasının meyitini və əlində silah olan Martini görür. Saxta ittihamla üzləşən Martin atasının gizli cəmiyyətinə başçılıq etməyə məcbur qalır və Federiko adı altında yoxsul cildinə girərək Rominaya qatili tapmaqda yardım etməyə söz verir.

Argentina istehsalı olan «Collar de Esmeraldas» serialı dram, komediya və melodrama xüsusiyyətlərini özündə birləşdirir. 2006-cı ildə yayımlanan layihənin rejissor kürsüsündə Mariano Ardanas və Klaudio Qarsiya əyləşib. Ekran əsərinin baş rollarını Osvaldo Laport, Karina Dzampini, Norberto Dias və Xose Mariya Monxe canlandırıb.