Möhtəşəm irs

Atasının vəfatından sonra ögey anası tərəfindən bütün mirasdan məhrum edilən Qo In-son çətin vəziyyətdə qalır, üstəlik kiçik qardaşı In-u da yoxa çıxır. Ağır sınaqlara baxmayaraq, o, xəyallarından əl çəkmir və tapdığı hər bir işdə çalışmağa başlayır. Qəza nəticəsində yaddaşını itirən yaşlı qadın Can Suk-çanı görən In-son ona sahib çıxaraq qayğısına qalır.

Lakin gənc qız bilmir ki, sığındığı bu qadın böyük qida şirkətinin rəhbəri və hava limanında təsadüfən çantalarını dəyişik saldığı Son U-hvanın nənəsidir. Qızın başına gələn bir çox çətinliklərin səbəbkarı olan U-hvan ilə In-son yenidən üz-üzə gəlir. Daimi mübahisələr və anlaşılmazlıqlar fonunda onlar bir-birlərinə qarşı əsl hisslər bəslədiklərini anlamağa başlayırlar.

«Möhtəşəm irs» (Chanranhan yusan) adlı Cənubi Koreya serialı 2009-cu ildə rejissor Çin Hyok tərəfindən çəkilib. Layihədə baş rolları Han Hyo-cu, Li Sın-qi, Mun Çhe-von və Pe Su-bin canlandırıblar.