Səni hər şeydən çox sevirəm

Zərgərlik şirkəti Tiffany & Co.-nun ictimaiyyətlə əlaqələr şöbəsində çalışan Mia Kurihara karyerası ilə şəxsi həyatı arasında qalır. Nişanlısı ailə qurduqdan sonra onun işdən çıxmasını tələb etsə də, Mia sevdiyi peşədən uzaqlaşmaq istəmir. İşgüzar səfər zamanı nişan üzüyünü itirən qıza onu tapmaqda tanımadığı bir kişi kömək edir.

Həmin şəxs qısa müddət sonra şirkətin yeni vitse-prezidenti Kairi Mioşi kimi iş yerində peyda olur. Rəhbər Mianın peşəkar fəaliyyətini davam etdirmək istəyinə anlayışla yanaşır və ona dəstək verir. Kairinin evli olmasına baxmayaraq, bir yerdə çalışan cütlüyün arasında zamanla qarşılıqlı hisslər yaranmağa başlayır.

2016-cı ildə Yaponiyada çəkilən «Seisei suruhodo, Aishiteru» romantik dram serialıdır. Ekran əsərinin rejissorları Yasuharu Ishii və Shingo Okamoto, baş rol ifaçıları isə Emi Takei, Hideaki Takizawa, Aoi Nakamura və Erena Mizusawadır.