Qəsbkar

«La usurpadora» dram teleserialı uşaqlıqdan ayrı düşmüş və bir-birindən tamamilə fərqli həyat sürən iki əkiz bacının taleyini əks etdirir. Paulina xəstə anasına baxaraq kasıb daxmada yaşayan xeyirxah bir qızdır. Paola isə imkanlı ərinin olmasına baxmayaraq, əyləncələrə qurşanmış və başqa kişilərlə vaxt keçirən eqoist bir qadındır.

Bir-birinin varlığından xəbərsiz olan bacıların yolu təsadüfən kəsişir. Paola öz yerinə Paulinanı bir illiyə ərinin malikanəsinə göndərmək, özü isə yeni sevgilisi ilə dünyanı gəzmək planı qurur. Vəziyyətin məcburiyyəti qarşısında qalan Paulina bu təklifi qəbul edərək Karlos Daniel Braçonun evinə yollanır, lakin bu ailədə heç kim Paolanın qayıdışına sevinmir.

Meksika istehsalı olan bu melodram 1998-ci ildə rejissorlar Beatris Şeridan və Karina Dupres tərəfindən çəkilib. Əsas rolları Qabriela Spanik, Fernando Kolunqa, Libertad Lamarke və Şantal Andere canlandırıblar.