Katib

Altı il Nyu-Yorkda pitsa çatdırılması ilə məşğul olan Emilio Boqotada bir qızının böyüdüyünü təsadüfən öyrənir. Yaxşı ata olmaq arzusu ilə yaşayan bu xeyirxah gənc dərhal vətəninə qayıtmaq qərarına gəlir. Cibində heç bir vəsaiti olmayan Emilio iş axtarışında baş verən anlaşılmazlıq nəticəsində qadınların çoxluq təşkil etdiyi katiblər mühitinə düşür.

O, şirkətin rəhbər vəzifəli şəxsi Antoniaya katib təyin olunur və qısa müddətdə ona qarşı dərin hisslər bəsləməyə başlayır. Ətrafdakılara kömək etmək istəyi ucbatından tez-tez çətinliklərlə üzləşən Emilio sevgisi uğrunda fədakarlıq etməyə belə hazırdır. Lakin onun qarşısında böyük bir maneə var: şirkətin sahibi və eyni zamanda Antonianın nişanlısı olan Feliks Sequra onun barışmaz rəqibinə çevrilir.

Kolumbiya istehsalı olan «Katib» komediya-dram serialı 2011-ci ildə işıq üzü görüb. Ekran əsərinin quruluşçu rejissorları Xuan Kamilo Pinson və Unay Amuçasteqidir, baş rolları isə Xuan Pablo Espinoza, Stefani Kayo, Fernando Solorsano və Fabian Mendoza canlandırır.