OVNI(s)

Fransa və Belçika istehsalı olan «OVNI(s)» komediya serialı tamaşaçıları 1978-ci ilə aparır. İstedadlı kosmik mühəndis Didye Matyurun illərdir qurduğu planlar hazırladığı raketin elə buraxılış anında partlaması ilə alt-üst olur. Uğursuzluqdan sonra rəhbərlik mütəxəssisi naməlum uçan obyektləri araşdıran GEPAN adlı xüsusi şöbəyə rəhbər təyin edir.

Dəqiq elmlərə inanan rasionist alim mətbuatda peyda olan qəribə hadisələrə elmi izahatlar tapmaq məcburiyyətində qalır. Belə qeyri-adi sahədə çalışmaq onun üçün əsl əziyyətə çevrilir. Lakin gözlənilməz bir hadisə Didyenin bütün əqidəsini sarsıdır və onu əvvəllər qeyri-mümkün saydığı faktlarla üz-üzə qoyur.

İki mövsümdən ibarət fantastik serialın rejissorluğunu Antoni Kordye həyata keçirib. Ekran əsərində əsas rolları Melvil Pupo, Mişel Vüyyermoz, Dafna Patakiya və Jeraldin Pelas canlandırır.