Böyük Merlin

Qədim dövrlərdə əjdahalar, pərilər və cadugərlər insanlarla birgə yaşayır, heç kim qeyri-adi hadisələrə təəccüblənmirdi. Təkallahlılıq inancı yayıldıqca insanlar sehrbazları və sehrli varlıqları tədricən unutmağa başladılar.

Qaranlıq kraliçası Meb əvvəlki gücünü bərpa etmək üçün zalım kral Vortinqer və pəri Morqana ilə əlbir olur. Onlar sehirbaz Merlini qaranlıq qüvvələrin başçısına çevirmək niyyətindədirlər. Merlin isə gələcək kral Arturu yetişdirmək, qızıl Kamelot qəsrini qurmaq və dünyanı bəlalardan qurtaracaq müqəddəs qədəhi tapmaq istəyir.

ABŞ və Böyük Britaniya istehsalı olan «Böyük Merlin» (Merlin) fentezi serialı 1998-ci ildə ekranlara çıxıb. Rejissor Stiv Bərronun çəkdiyi layihədə əsas rolları Sem Nil, Helena Bonem Karter, Con Qilqud və Rutger Hauer ifa ediblər.