Ştamm

Nyu-York hava limanında göyərtəsindəki insanların hamısının həyatını itirdiyi bir sərnişin təyyarəsi təcili eniş edir. Bu müəmmalı hadisənin səbəblərini araşdırmaq üçün təyyarəyə şəhərin baş epidemioloqu Efrem Qudvezerin rəhbərlik etdiyi alimlər qrupu göndərilir. Tədqiqatlar zamanı məlum olur ki, sərnişinlər bütün bəşəriyyəti məhv edə biləcək qorxunc vampirizm virusuna yoluxublar.

Cəmiyyətdə təşviş artdıqca, bu təhlükəli xəstəliyə qarşı mübarizə aparmağa cəmi bir neçə nəfər cəsarət edir. Həkim Qudvezer və onun tibb komandası xüsusi biliklərə malik olan yerli sakinlərlə, o cümlədən siçovul ovçusu Vasili Fetlə birləşərək epidemiyanın qarşısını almağa çalışır.

«The Strain» ABŞ və Meksika istehsalı olan qorxu, triller, dram və fentezi janrında çəkilmiş dörd mövsümlük serialdır. 2014-cü ildə yayımlanan layihənin rejissor kürsüsündə C. Maylz Deyl və Kevin Daulinq əyləşib. Baş rolları Kori Stoll, Mia Maestro, Devid Bredli və Rixard Zammel canlandırır.