Peyğəmbər

Markus uşaqlıqdan bəri gələcəkdə baş verəcək hadisələri görmək bacarığına malikdir və bu xüsusiyyət valideynlərini daim narahat edir. Kiçik qardaşının faciəvi şəkildə həyatını itirəcəyini əvvəlcədən bilsə də, bunun qarşısını ala bilmir. Vicdan əzabı çəkən Markus ailəsinin məsləhəti ilə bacısının yanına, böyük şəhərə köçməyə qərar verir. Burada o, şüşə fabrikində çalışan Sonya adlı xanımla tanış olur və onun həyatının sevgisi olduğunu anlayır.

Lakin Sonya onun əmisi oğlu Kamilunun nişanlısıdır. Qəlbindəki hissləri unutmağa çalışan Markus tamamilə fərqli xarakterə malik Rut ilə münasibətə başlayır. Şəhər mühitində Markusun qeyri-adi istedadından şəxsi maraqları üçün istifadə etmək istəyən insanlar peyda olur. Gənc oğlan bacarığını kimlərinsə qazancına xərcləmək və ya əsl həyati qayəsini axtarmaq arasında seçim etməlidir.

Braziliya istehsalı olan «O Profeta» teleserialı 2006-cı ildə nümayiş olunub. Layihənin rejissor kürsüsündə Mario Marsio Bandarra və Aleşandre Bori əyləşib. Əsas rolları Tiaqu Fraqozu, Fernanda Souza, Dalton Viq və Paola Oliveyra canlandırıblar.