Əbədi qanun

Biri təcrübəli, digəri isə yeni olan iki mələk xüsusi tapşırıqla Britaniyanın York şəhərinə göndərilir. Onlar adi insanların görmədiyi qanadlarını gizlədərək məhkəmələrdə vəkil kimi çıxış etməyə başlayırlar. Şəhərdə onları vaxtilə insanla ailə qurub əbədiyyətini itirən və dul qaldıqdan sonra onların məişət qayğılarını öz üzərinə götürən keçmiş mələk qarşılayır.

Səmavi vəkillərin qarşısında qəti bir qayda var: insanlara yalnız düzgün istiqamət vermək olar, onların yerinə qərar vermək qadağandır. Məhkəmə proseslərində onlara qarşı yıxılmış mələk Riçard Pembrok durur. Eyni zamanda mələklərdən biri əvvəlki gəlişində sevdiyi, lakin indi onu tanımayan qadınla yenidən qarşılaşır.

Britaniya istehsalı olan «Əbədi qanun» (Eternal Law) fentezi-dram serialı 2012-ci ildə nümayiş olunub. Ekran işinin rejissorları Adrian Şerqold və Cemi Peyndir, əsas rolları isə Semyuel Uest, Akveli Rouç, Orla Bredi və Hetti Morahen canlandırıblar.