Hər addımda heyrət

Müasir dövrdə yaşayan gənc qız Jan Syao qəzaya uğradıqdan sonra gözlərini əsrlər öncəki keçmişdə açır. O, Tsin sülaləsinin hökmranlıq etdiyi dövrdə on altı yaşlı mancur əsilzadəsi Maertay Jo Sinin bədənində oyanır. Məlum olur ki, qəhrəmanın keçmiş təcəssümü sayılan bu gənc qız da öz dövründə bədbəxt hadisə ilə üzləşib.

Tamamilə fərqli bir mühitə düşən Jan Syao saray əyanlarının qaydalarına və yad adətlərə uyğunlaşmaq məcburiyyətində qalır. İyirmi birinci əsrin düşüncəsinə sahib olan qəhrəman qədim dövrün intriqaları və mürəkkəb münasibətləri arasında özünə yol tapmağa çalışır.

«Startling by Each Step» adlı Çin serialı 2011-ci ildə ekranlara çıxıb. Fantaziya və melodram janrlarını birləşdirən layihənin rejissoru Li Kvok-Lapdır, baş rolları isə Sesiliya Lyu, Nikki U, Kevin Çen və Yuan Xun canlandırıb.