Revelations

Qədim kəlamlar bəşəriyyəti qaçılmaz fəlakət barədə xəbərdar edirdi və artıq həmin qorxulu proqnozlar gerçəkləşməyə başlayır. Axırzamanın ilkin əlamətləri yer üzündə peyda olsa da, çoxları bu qeyri-adi hadisələri görməzdən gəlir. İnsanlar üçün pak mayalanmaya, yeni bir qurtarıcının gəlişinə və Deccalın zühuruna inanmaq həddindən artıq çətindir.

Astrofizik Riçard Messi bütün həyatını sırf elmi sübutlar və qanunlar üzərində qurub. Lakin şeytana sitayiş edən təriqət üzvlərinin onun on iki yaşlı qızını qurban verməsi alimin dünyasını darmadağın edir. Öz iradəsindən asılı olmayaraq müəmmalı proseslərin iştirakçısına çevrilən alim illərlə rədd etdiyi mistik qüvvələrin varlığı ilə barışmaq məcburiyyətində qalır. Təhlükənin miqyasını anlayan Messi bəşəriyyəti xilas etmək naminə hərəkətə keçir.

ABŞ istehsalı olan «Revelations» serialı 2005-ci ildə işıq üzü görüb. Layihənin rejissor kürsüsündə Lili Fini Zanuk və Lesli Linka Qlatter əyləşib. Əsas obrazları Bill Pullman, Nataşa Makelxon, Maykl Massi və Mark Rendall canlandırıb.