Youkai Sharehouse

Özünə inamı olmayan və başqalarının fikirlərindən çəkinən Mio Mequro hər kəsi razı salmağa çalışır. Həmkarı ilə qurduğu münasibət isə əsl fəlakətlə nəticələnir: sevgilisinin ucbatından külli miqdarda borca düşən gənc qadın həm işini, həm də evini itirir. Küçədə çarəsiz qalıb huşunu itirən Mio gözlərini naməlum bir paylaşımlı mənzildə açır.

Evdəki mehriban sakinlər tezliklə öz həqiqi kimliklərini bəlli edirlər. Onlar adi insanlar deyil, yapon mifologiyasının fövqəltəbii varlıqları olan yokaylardır. Qızın acınacaqlı durumuna ürəkləri yanan bu qəribə qonşular onun problemlərini özünəməxsus sərt və qeyri-adi üsullarla həll etməyə girişirlər.

2020-ci il istehsalı olan yapon serialı «Youkai Sharehouse» fantastika, komediya və qorxu janrlarını birləşdirir. İki mövsümdən ibarət layihənin rejissor kürsüsündə Daisuke Yamamoto və Keisuke Toyoshima əyləşib, baş rolları isə Fuka Koshiba, Marika Matsumoto, Katsuya Maiguma və Nobue Iketani canlandırır.