Bulyanjen

«Bulyanjen» serialı Tan sülaləsinin süqutu dövründə baş verən qarışıqlıqdan bəhs edir. Hökmdar hakimiyyətinin zəifləməsi ilə birlikdə dövlət xəzinəsi və gizli agentlərdən ibarət gizli təşkilat yoxa çıxır. Əhali arasında xəzinənin sirrinin əfsanəvi Lunçuan qılıncında saxlanıldığına dair şayiələr yayılır. Mənşəyi sirr olaraq qalan yetim Li Sin-yun və bacısı Lu Lin-süan tərki-dünya Yan Şu-tszı tərəfindən xilas edilərək döyüş sənətləri üzrə yetişdirilir.

Böyüyüb güclənən gənclər təcrübə toplamaq məqsədilə dağdakı sığınacaqlarını tərk edib böyük şəhərlərə yollanırlar. Səyahət zamanı onlar Tszı Ju-süe və Çjan Tszı-fanla tanış olurlar. Təsadüf nəticəsində Lunçuan qılıncı bu dördlüyün əlinə keçir. Əfsanəvi silahın onlarda olduğunu bilən müxtəlif düşmən klanlar və güclü qruplar qəhrəmanların izinə düşür.

Çin istehsalı olan bu tarixi dram serialı 2016-cı ildə təqdim edilib. Ekran əsərinin quruluşçu rejissorları Van Vey və Qo Şubodur. Baş rolları Çjen Yeçen, Li Çun, Fan Şitsi və Tsay Ventszin canlandırıb.