Səlib yürüşləri

On birinci əsrin sonlarında Qərbi Avropa feodalları və katolik kilsəsi Yaxın Şərqə doğru hərbi səfərlərə başladı. Bu yürüşlərin rəsmi bəhanəsi Müqəddəs Torpaqları və Fələstini azad etmək adı ilə pərdələnmişdi. Təxminən iki yüz il davam edən həmin qanlı qarşıdurma Səlahəddin Əyyubi və Şirürəkli Riçard kimi tarixi şəxsiyyətləri üz-üzə gətirdi, Şərqlə Qərb arasında dərin izlər buraxdı.

«Səlib yürüşləri» sənədli serialı bu tarixi toqquşmanın kökündə dayanan əsl iqtisadi, siyasi və dini maraqları araşdırır. Aparıcı böyük orduları uzaq səfərlərə çıxaran gizli amilləri addım-addım təhlil edir. Ekran əsəri doqquz əsr əvvəl əsası qoyulmuş münaqişələrin müasir dünyaya göstərdiyi təsirləri aydınlaşdırmağa çalışır.

Böyük Britaniya istehsalı olan bu layihə 1995-ci ildə işıq üzü görüb. Rejissor kürsüsündə Alan Ereyra və Devid Uolles əyləşib, araşdırmanı isə Terri Cons təqdim edir. Rollarda həmçinin Marsello Uolton, Kemmi Darveyş və Entoni Zaki çəkiliblər.