Napoleon və Jozefina: Bir sevgi hekayəsi

Gənc sərkərdə Napoleon Bonapart Fransanı bürümüş qarışıqlıqdan çıxarmaq və Avropanın ən güclü dövlətinə çevirmək məqsədilə qətiyyətlə irəliləyir. Ordusuna arxalanaraq bütün qitədə hökmranlıq quran iddialı korsikalı, sonda özünü imperator elan edir. Lakin bu dərəcədə sərt və qətiyyətli bir xadim belə qarşısına çıxan cazibədar qadının təsirindən qaça bilmir.

Napoleon edam olunmuş əsilzadənin dul qalmış həyat yoldaşı və iki uşaq anası olan Jozefina ilə tanış olur. Yaş fərqinə və qadının keçmiş əlaqələrinə baxmayaraq, bu görüş böyük və ehtiraslı bir məhəbbətin başlanğıcına çevrilir. Hisslərinə təslim olan imperator bu sevgidən güc alaraq yeni zəfərlərə doğru addımlayır.

ABŞ və Fransanın birgə istehsalı olan «Napoleon və Jozefina: Bir sevgi hekayəsi» tarixi dram serialı 1987-ci ildə nümayiş olunub. Ekran əsərinin rejissoru Riçard T. Heffrondur, baş rolları isə Armand Assante, Jaklin Bisset, Stefani Biçem və Entoni Hiqqins canlandırıb.