Bir addım belə geri yox!

Kənddə böyüyən Toşka Lıtkina ətrafındakı hər kəsə qarşı səmimi sevgisi ilə seçilən sadəlövh bir qız idi. Düşmənin hava hücumu zamanı onun kəndi yerlə-yeksan olur, anası və kiçik qardaşı isə gözləri önündə həlak olur. Atası da müharibənin ilk günlərində cəbhədə dünyasını dəyişdiyindən, möcüzə nəticəsində sağ qalan Toşka tamamilə kimsəsiz qalır.

Yaşadığı faciədən sonra qəlbində intiqam hissi baş qaldırır və o, doğmalarının qisasını almaq üçün cəbhəyə getmək qərarına gəlir. Lakin zabit on altı yaşlı qızı həddindən artıq gənc hesab edərək ön xəttə göndərməkdən imtina edir. Qarşısına məqsəd qoyan Toşka isə hərbi xidmətə yararlı olduğunu və hər çətinliyə dözə biləcəyini sübut etməyə çalışır.

2019-cu il istehsalı olan «Bir addım belə geri yox!» («Ни шагу назад!») hərbi dram serialı iki mövsümdən ibarətdir. Belarus istehsalı layihənin rejissor kürsüsündə Dmitri Sorokin və Jora Ferorenko əyləşib, baş rolları isə Valentina Popova, Qela Mesxi, Mariya Şukşina və Fyodor Qurinets canlandırıb.