Əkizlər

Valideynləri ayrıldıqdan sonra Spayt və Zi uşaqlıqdan ayrı böyüməyə məcbur qalsalar da, xarici görünüşcə bir-birlərindən seçilmirlər. Onların maraq dairələri də tamamilə fərqli idman sahələrinə yönəlib: Spayt ciu-citsu ilə məşğul olur, Zi isə universitetin perspektivli voleybolçusudur. Həlledici yarış ərəfəsində Ziyə edilən hücum onun ağır xəsarət alması və xəstəxanaya düşməsi ilə nəticələnir.

Qardaşının karyerasının təhlükə altına düşməsində özünü günahkar sayan Spayt onun yerinə keçməyə razılıq verir. Döyüş ustası universitetin voleybol komandasında Zini əvəzləyərək meydançaya çıxır və yoldaşları ilə birlikdə qələbə qazanmağa çalışır. Bu çətin prosesdə o, həm fərqli oyun qaydalarına öyrəşməli, həm də həqiqəti komanda yoldaşlarından gizlətməlidir.

«Əkizlər» (Twins) serialı Tayland istehsalı olan idman və romantik komediya layihəsidir. 2023-cü il ekran işinin rejissor kürsüsündə Pro Siwasit Phondongnok və Ball Kanathorn Tabvilai əyləşib. Əsas rolları isə Frame Ritchanon Sriprasitdacha və Ryan Panya Mcshane ifa edir.