Makarovla qızlar

Rəhbərliklə yaranan münaqişədən sonra Butovo rayonu üzrə cinayət-axtarış şöbəsinin rəisi Pavel Makarovun təcrübəli kişi əməkdaşları əlindən alınır. Cəza olaraq onun tabeliyinə polis məktəbini indicə bitirmiş dörd gənc qız təyin edilir. Bir-birindən tamamilə fərqlənən məzunlar mayorun şöbəsində xidmətə başlayırlar.

Yeni işçilərin hərəsinin öz xarakteri var: biri təkəbbürlü əlaçı, digəri yüngülxasiyyət gözəl, üçüncüsü kobud idmançı, dördüncüsü isə fikri körpəsinin yanında qalan sadəlövh anadır. Qızların təcrübəsizliyi onsuz da qadınlarla yola getməyən rəisi təngə gətirir. Makarov bu heyətdən yaxa qurtarmaq istəyir, gənc leytenantlar isə polis peşəsinə təsadüfən gəlmədiklərini sübut etməyə çalışırlar.

Rusiyada çəkilən «Makarovla qızlar» komediya serialı 2020-ci ildə ekranlara çıxıb və 5 mövsümdən ibarətdir. Ekran əsərinin rejissorları Konstantin Smirnov və Radda Novikovadır, baş rolları isə Pavel Maykov, Alevtina Tukan, Valeriya Astapova və Vlada Yermolayeva canlandırıb.