Silikon Vadisi

San-Fransiskonun yüksək texnologiyalar mərkəzində toplaşan bir qrup istedadlı mütəxəssis şəxsi layihələrini ərsəyə gətirməyə çalışır. Onlar yaşayış xərclərini ödəmədən yerli milyonçunun evində məskunlaşıb öz startapları üzərində işləyirlər.

Lakin bu təmənnasız görünən köməyin öz şərti var: ev sahibi gələcəkdə əldə ediləcək bütün qazancın on faizinə şərik çıxır. Gənc proqramçılar təkcə texniki çətinlikləri deyil, həm də biznes mühitinin gözlənilməz sınaqlarını dəf etmək məcburiyyətində qalırlar.

ABŞ istehsalı olan «Silicon Valley» komediya serialı 2014-cü ildə yayımlanmağa başlayıb və ümumilikdə 6 mövsümdən ibarətdir. Layihənin rejissor kürsüsündə Mayk Cadc və Alek Berq əyləşib, baş rolları isə Tomas Middlditç, Coş Brener, Martin Starr və Kumeyl Nanciani canlandırıb.