Bridget & Eamon

1980-ci illərin İrlandiya qəsəbəsində məskunlaşan bir ər-arvad bir-biri ilə yola getməkdə çətinlik çəkir və ümumi uşaqlarının sayını belə qarışdırır. «Bridget & Eamon» serialı bu qəribə ailənin ziddiyyətlərlə dolu gündəlik məişətindən bəhs edir. Həyat yoldaşını davamlı olaraq normal iş tapmamaqda günahlandıran qadın bir tərəfdən aramsız siqaret çəkir, digər tərəfdən isə acı atmacalarından qalmır.

Eamon arvadının bu xasiyyətindən qətiyyən məmnun olmasa da, onun könlünü almaq üçün yollar axtarır. Üzləşdikləri çoxsaylı problemlərə baxmayaraq, o, ailədə xoşbəxtliyin mümkün olduğuna Bridget-i inandırmağa çalışır. Ər və arvad bitmək bilməyən narazılıqların içindən birlikdə çıxış yolu tapmağa cəhd göstərirlər.

İrlandiya istehsalı olan bu komediya layihəsinin rejissoru Ceyson Batlerdir. Baş rolları Cennifer Maqvayr, Bernard O'Şi, Kolum MakDonnel və Edvin Sammon canlandırıblar. 2016-cı ildə yayımlanmağa başlayan serial ümumilikdə 4 mövsümdən ibarətdir.