Sexify

Tələbə Natalya yuxunu yaxşılaşdıran mobil tətbiq üzərində uzun müddət çalışır və bu layihə ilə nüfuzlu tələbə yarışmasında qalib gələcəyinə inanır. Lakin yeni təyin olunan müəllim mövzunun kifayət qədər maraqlı və cəlbedici olmadığını bildirir. Ətrafdakı həyatı müşahidə edən gənc qız tamamilə yeni sahəyə keçmək və qadın orqazmını öyrənən innovativ bir tətbiq hazırlamaq qərarına gəlir.

Şəxsi təcrübəsi az olan Natalyaya kömək lazımdır, buna görə də o, iki tanışını prosesə cəlb edir. Dindar ailədə böyüyən rəfiqəsi Paulina və zəngin ailədən gələn azad fikirli qonşusu Monika onunla ortaq olurlar. «Sexify» serialının qəhrəmanları texniki bilikləri real həyat təcrübəsi ilə birləşdirərək qeyri-adi startapı tamamlamağa çalışırlar.

Polşa istehsalı olan iki mövsümlük komediya serialı 2021-ci ildə işıq üzü görüb. Layihənin rejissor kürsüsündə Kalina Alabrudzinska və Piotr Domalevski əyləşib, əsas rolları isə Aleksandra Skraba, Maria Sobotsinska, Sandra Drzımalska və Yan Veteska canlandırıb.