Möcüzə

Varlı ailənin qızı olan Anna gecə klublarında əyləncəli həyat sürməyə alışıb. Gözlənilməz hamiləlik onun planlarını alt-üst edir: nə sevgilisi Den, nə valideynləri, nə də qızın özü körpə istəmir. Çıxış yolu tapmayan Anna abort etdirmək qərarına gəlir və xəstəxanaya yollanır.

Lakin klinikada gözlənilməz hadisə baş verir — bətnindəki rüşeym dil açıb danışmağa başlayır və gənc ananı bu fikrindən daşındırır. Doqquz aylıq hamiləlik müddətində Annanın qarşısına saysız-hesabsız maneələr çıxır. Gələcək oğlunun verdiyi məsləhətlər olmasaydı, qız yaranan vəziyyətlərdən təkbaşına çıxa bilməzdi.

«Möcüzə» komediya və melodrama janrında çəkilmiş Rusiya serialıdır və 2009-cu ildə rejissor Oleq Asadulin tərəfindən lentə alınıb. Baş rolları Olesya Jeleznyak, Alyona Yakovleva, Leonid Qromov və Vladimir Sterjakov canlandırıblar.