Kuxnya

Maksim Lavrov kulinariyanın dünyanı idarə edən güc olduğuna inanır və peşəkar aşpaz olmaq xəyalı ilə yaşayır. Bu arzusunun ardınca paytaxta yollanan gənc oğlan Moskvanın ən bahalı və dəbdəbəli restoranlarından birində işə düzəlməyi bacarır. Lakin prestijli məkanda onu heç də təsəvvür etdiyi kimi sakit həyat gözləmir.

Mətbəxin rəhbəri Viktor Barinov qastronomiya aləmində məşhur ustad olsa da, qumar aludəçiliyi, içki vərdişi və dözülməz xasiyyəti ilə hər kəsi təngə gətirir. İşə başlamazdan əvvəlki gecəni təsadüfən restoranın iddialı art-direktoru Viktoriya ilə keçirən Maksim həm onun soyuq münasibəti, həm də təcrübəli aşpazların istehzaları ilə üzləşməli olur.

2012-ci ildə Rusiyada çəkilən «Kuxnya» komediya serialı altı mövsümdən ibarətdir. Ekran işinin rejissor kürsüsündə Dmitri Dyaçenko və Jora Krıjovnikov əyləşib, əsas rolları isə Dmitri Nazarov, Mark Boqatıryov, Yelena Podkaminskaya və Viktor Xorinyak canlandırıb.