Sevginin 220 voltu

Meteoroloq qızı Maşa Neçayeva uzaq tundranı tərk edərək miras qalmış mənzili təhvil almaq üçün Moskvaya yola düşür. Yerli şaman qızı gözlənilməz çətinliklərdən qorumaq məqsədilə qədim ayin icra edir və onun cib telefonunu canlandırır. Lakin sehrli tilsim kimi düşünülən bu telefon öz vəzifəsinin öhdəsindən gələ bilmir: Maşa elə ilk gündən pullarını itirir, evsiz qalmaq təhlükəsi ilə üzləşir və estrada ulduzu Apollonun maşınının altına düşür.

Qalmaqalın böyüməməsi üçün Apollonun prodüseri Marqarita Ternovskaya zərərçəkən qıza öz mərkəzində xadimə vəzifəsi verir. Beləliklə, Maşa yerli şou-biznes mühitinin mərkəzinə düşür. Onun canlanmış telefonu isə şamanın vaxtilə sehrlədiyi digər köhnə tanışlarını — kompüter siçanını və tozsoranı tapır, nəticədə qızın başına gələn problemlərin sayı qat-qat çoxalır.

Rusiyada çəkilmiş «220 volt любви» komediya serialı 2010-cu ildə işıq üzü görüb. Ekran işinin quruluşçu rejissoru Vladimir Filimonovdur. Baş rolları Yelena Velikanova, İrina Lukina, Yekaterina Madalinskaya və İqor Artaşonov canlandırıb.