Mən yalnız səni sevirəm

«Mən yalnız səni sevirəm» (Wo zhi xi huan ni) serialı yuxarı siniflərdə bir yerdə oxumuş Zhao Qiaoyi və Yan Mo adlı gənclərdən bəhs edir. Qız dərslərini zəif oxuyurdu, oğlan isə məktəbin ən yaxşı şagirdlərindən sayılırdı. Məzuniyyət ərəfəsində onlar xaricə birlikdə təhsil almağa gedəcəklərinə dair söz versələr də, Yan Mo ölkəni tək tərk etməli olur.

İllər sonra keçmiş sinif yoldaşları yenidən üz-üzə gəlirlər. Qəlbindəki hissləri qəbul edən Qiaoyi Yan Monun arxasınca başqa şəhərə köçmək qərarına gəlir. Həyatda böyük nailiyyətlər qazanmış Yan Mo isə qıza olan sevgisini etiraf etməkdə hələ də çətinlik çəkir.

Ekran əsəri yazıçı Qiaoyinin öz həyat təcrübəsinə əsaslanan avtobioqrafik romanı üzrə çəkilib. 2019-cu il istehsalı olan bu Çin melodramının rejissoru Wang Zhi, baş rol ifaçıları isə Wu Qian, Zhang Yujian, Zhao Zhiwei və Ma Lidir.