Manhetten sevgi hekayəsi

Tokioda yerləşən «Manhetten» qəhvəxanasının azdanışan sahibi bütün diqqətini sevimli işinə yönəldib. Onun ən böyük arzusu müştərilərin bura məhz hazırladığı qəhvənin dadından zövq almaq üçün gəlməsidir. Lakin gələnlər masaları daha çox görüş təyin etmək, evlilik təklifi vermək və şəxsi münasibətlərini aydınlaşdırmaq üçün seçirlər.

Bir gün məkana Nobuko Akabane adlı taksi sürücüsü gəlir. Şəxsi həyatındakı qarışıqlıq ucbatından o, sifariş etdiyi fincana toxunmadan oranı tərk edir. Bu vəziyyət qəhvəxana sahibinin marağına səbəb olur və o, qadının sevgisini qaydaya salmağa kömək etmək qərarına gəlir ki, qonaq sonda onun içkisini dada bilsin.

2003-cü ildə yayımlanan «Manhattan rabu stôrî» melodram və komediya janrında çəkilmiş Yaponiya serialıdır. Ekran işinin rejissorları Nobuhiro Doi və Osamu Katayamadır, baş rolları isə Masahiro Matsuoka, Mitsuhiro Oikawa, Wakana Sakai və Takashi Tsukamoto canlandırıb.