Evlənməyən kişi

Qırx yaşlı memar Shinsuke Kuwano tənha yaşamaqdan zövq alır. İnsanları sevməsə də, onlar üçün uğurla gözəl binalar layihələndirir. Axşamlar işdən sonra özünə şam yeməyi hazırlayır, kreslosunda oturub klassik musiqi dinləyir. Nə bir dostu var, nə də qohumları ilə ünsiyyət qurmaq istəyir; qonşuları isə mənzilinə heç vaxt yaxın buraxmır.

Bir gün qəfil xəstələnməsi Shinsukeni başqalarının yardımına möhtac qoyur. Memarın kobudluğuna baxmayaraq, xeyirxah qonşu qadın ona təcili yardım çağırır və xəstəxanaya qədər müşayiət edir. Burada Kuwano onun kimi tənha olan həkim Natsumi Hayasaka ilə qarşılaşır. Həmin gündən etibarən bu iki qadın inadkar subayın gündəlik həyatının bir hissəsinə çevrilir.

«Evlənməyən kişi» (Kekkon dekinai otoko) Yaponiya istehsalı olan melodram və komediya serialıdır. 2006-cı ildə yayımlanan ekran işinin rejissorları Takashi Komatsu və Yoshishige Miyakedir. Baş rolları Hiroshi Abe, Yui Natsukawa, Ryoko Kuninaka və Takashi Tsukamoto canlandırıblar.