A Força do Querer

Gənc hüquqşünas Kayu sevgilisi Bibi ilə münasibətləri bitdikdən sonra həyatını kökündən dəyişmək qərarına gəlir. O, Braziliyanın ən iri şirkətlərindən biri olan Garcia firmasına rəhbərlik etmək imkanından imtina edərək Rio-de-Janeyronu tərk edir və ABŞ-a yollanır. Orada keçirdiyi on beş il ərzində əxlaqi dəyərlərə sadiq qalaraq hüquq sahəsində böyük peşəkar uğurlar qazanır.

Kayu vətəninə qayıtdıqdan sonra yerli məhkəmə sistemində yüksək vəzifəyə təyin olunur və karyerasını uğurla davam etdirir. Lakin bu fəaliyyət onu yenidən keçmiş sevgilisi ilə qarşı-qarşıya gətirir. Həmin illər ərzində tamam başqa bir yol seçən Bibi artıq cinayət dünyasının bir parçasına çevrilib.

Braziliya istehsalı olan «A Força do Querer» serialı 2017-ci ildə nümayiş olunub. Kriminal dram janrındakı layihənin quruluşçu rejissorları Rojeriu Qomeş və Pedro Vaskonselosdur. Əsas rolları Juliana Paes, Debora Falabella, Rodrigo Lombardi və Paolla Oliveira canlandırır.