Mavililər

1971-ci ildə Meksikada dörd qadın cəmiyyətin mühafizəkar qaydalarını aşaraq ölkənin ilk qadın polis bölməsinə daxil olur. Lakin çox keçmədən bu addımın sadəcə ictimaiyyəti aldatmaq və mətbuatın diqqətini şəhərdə dolaşan qatildən yayındırmaq üçün atılmış bir reklam fəndi olduğu üzə çıxır.

Qurbanların sayı getdikcə artır, rəhbərlik isə yeni heyətə ciddi səlahiyyətlər vermək istəmir. Yaradılan bölmənin əsl mahiyyətini anlayan dörd xanım aralarında razılığa gələrək cinayətkarı tapmaq və onu ədalət mühakiməsinə təslim etmək qərarına gəlir.

Meksika istehsalı olan «Mavililər» («Women in Blue») kriminal dram serialı 2024-cü ildə yayımlanıb və 2 mövsümdən ibarətdir. Ekran işinin rejissorları Fernando Rovzar və Xose Manuel Kraviotto, baş rol ifaçıları isə Barbara Mori, Ximena Sarinyana, Migel Rodarte və Nataliya Telyesdir.