Üçbucaq

Valideynlərini itirdikdən sonra ayrı düşən üç qardaş iyirmi il ərzində bir-birindən xəbərsiz böyüyür. Böyük qardaş atasının yolunu seçərək polis detektivi olur, küçələrdə böyüyən ortancıl qardaş isə kriminal aləmin zirvəsinə qalxır. O, cinayətkar həyatını böyük qardaşından gizlətsə də, kritik vəziyyət onu həqiqəti etiraf etməyə məcbur edir.

Körpə ikən varlı bir ailəyə övladlığa verilən kiçik qardaş isə əsl ailəsi barədə heç nə xatırlamır. O, pulun hər şeydən üstün olduğunu düşünən soyuqqanlı bir insana çevrilir və Yoon ailəsinin sərvətini artırmaq üçün hər yola əl atır. Lakin həyatına daxil olan bir gənc qız onun daşlaşmış qəlbini yumşaldaraq düşüncələrini dəyişir.

2014-cü ildə yayımlanan «Teuraiaenggeul» Cənubi Koreya istehsalı olan dram və kriminal serialıdır. Ekran əsərinin rejissorları Yoo Chul-yong və Choi Jung-gyu, baş rol ifaçıları isə Lee Beom-soo, Kim Jae-joong, Im Si-wan və Oh Yeon-soodur.