Müdafiəçilər

Las-Veqasda fəaliyyət göstərən hüquq bürosuna xaraktercə bir-birinə bənzəməyən iki vəkil rəhbərlik edir. Nik Morelli işin çətinliyindən asılı olmayaraq hər bir müştərinin hüquqlarını qorumaq üçün bütün gücünü sərf edir. Onun şəriki Pit Kaşmarek isə hüquq sahəsini sevsə də, bahalı geyimləri, lüks avtomobilləri və qadınların diqqətini hər şeydən üstün tutur.

İşlər çoxaldıqca büroya yeni simalar qatılır: keçmiş rəqqasəlik həyatını geridə qoymaq istəyən gənc hüquqşünas Liza Tayler və rəhbərlərini razı salmağa çalışan köməkçi Sofi komandaya daxil olur. Məhkəmə zallarında uğur onların tərəfində olsa da, şəxsi həyatları qaydasında getmir. Pit növbəti macəralar dalınca qaçarkən, Nik onu tərk etmiş həyat yoldaşı ilə münasibətlərini düzəltməyə və kiçik oğlunun yanında qalmağa çalışır.

ABŞ istehsalı olan «The Defenders» kriminal komediya serialı 2010-cu ildə işıq üzü görüb. Ekran əsərinin quruluşçu rejissorları Çarlz Heyd və Kristin Murdur, əsas rolları isə Ceyms Beluşi, Cerri O'Konnell, Cörni Smollett və Tanya Fişer canlandırıb.