Mad Dogs

Məktəb illərindən dost olan Vudi, Kuinn, Bakster və Rik artıq qırx yaş həddini geridə qoyublar. İllər onların şəxsi həyatına fərqli təsir göstərib: bəziləri evlənib, digərləri boşanıb və ya subay qalıb. Köhnə tanışlar Mayorkada yaşayan beşinci yoldaşları Alvonun dəvətilə İspaniyaya yollanırlar. Daşınmaz əmlak sahəsində uğur qazanaraq varlanan Alvo onları dəbdəbəli villasında toplayaraq təqaüdə çıxmasını qeyd etmək istəyir.

Tətil gözlənildiyi kimi sakit və əyləncəli keçmir. Tədricən dostların münasibətlərindəki köhnə sirlər, yalanlar və etibarsızlıq üzə çıxmağa başlayır. Hadisələr kriminallaşır və baş verən gözlənilməz qətl dörd dostu qorxunc bir burulğanın içinə sürükləyir.

Böyük Britaniya istehsalı olan «Mad Dogs» serialı dörd mövsümdən ibarətdir. Ekran işinə Edrian Şerqold və Ceyms Houz rejissorluq edib. Əsas rolları Con Simm, Mark Uorren, Filip Qlenister və Maks Bisli canlandırıblar.