Yaxşı əllər

Olqa Savelyeva şəhərin ən nüfuzlu doğum evinə rəhbərlik edir və eyni zamanda yaratdığı xüsusi mərkəz vasitəsilə körpələrindən imtina etmək istəyən qadınları nəzarətə götürür. O, bu anaları öz xəstəxanasına yönəldir və atılmış körpələri uşaq evlərinə göndərmək əvəzinə, böyük məbləğdə təşəkkür qarşılığında zəngin və sonsuz ailələrə verir. Həkim bu qaranlıq fəaliyyəti alver deyil, uşaqların gələcəyini xilas edən xeyirxah bir iş kimi qiymətləndirir.

Şəxsi həyatında təkbaşına böyütdüyü oğlu Nikita xaricdəki nüfuzlu universitetə qəbul olunduqdan sonra şəhərkənarı bağ evində dostları ilə vida gecəsi keçirir. Anasının zənglərinə cavab verməyən gəncin tezliklə qətlə yetirildiyi məlum olur. Qətlin araşdırmasını Olqanın keçmiş əri, müstəntiq Gennadi Muxin öz üzərinə götürür və cinayətin izinə düşərkən hadisənin Olqanın xəstəxana fəaliyyəti ilə birbaşa əlaqəli olduğunu aşkar edir.

2014-cü il istehsalı olan Rusiyanın «Yaxşı əllər» («Xoroşiye ruki») adlı kriminal dram serialına rejissor Yuri Kuzmenko quruluş verib. Ekran əsərində əsas rolları Yelena Ksenofontova, Nikita Salopin, Kirill Safonov və Nikolay Çindyaykin canlandırıblar.