Cekini öldürmək

Ceki Prays artıq iyirmi ildir ki, keçmişini hər kəsdən gizlədərək anonim şəkildə lüks bir ömür sürür. Vaxtilə beynəlxalq narkotik ticarəti ilə məşğul olsa da, bu təhlükəli sahəni vaxtında tərk edərək yeni səhifə aça bilib. Qurduğu maliyyə mexanizmləri ona illər boyu sakit və təhlükəsiz qalmaq imkanı verib.

Lakin arxasınca «Yeddi iblis» adlı peşəkar qatil dəstəsinin göndərildiyini öyrəndikdə hər şey alt-üst olur. Qadın qaçmaq əvəzinə ilk zərbəni endirməyi seçərək onu izləyənlərin izinə düşür. Ceki köhnə əlaqələrini və bacarıqlarını işə salsa da, qarşılaşdığı ən böyük təhlükə qatillər deyil, illərdir basdırdığı öz daxili kabusları olur.

«Kill Jackie» adlı triller və kriminal dram serialı ABŞ, İspaniya və Böyük Britaniyanın birgə istehsalıdır. Ekran işinə rejissorlar Doun Şadfort və Deymon Tomas rəhbərlik edib, əsas rolları isə Ketrin Zeta-Cons, Deniel İnqs, Sidse Babett Knudsen və Culian Raynd-Tatt canlandırıb.