Qüsurlar və onların pərəstişkarları

Vladimir Arxipov iti ilə birlikdə sakit bir ömür sürürdü və həyatında nəyisə dəyişmək niyyətində deyildi. Lakin qəribə xasiyyətli qonşusu Lizavetanın ölümü hər şeyi dəyişir. Qadın vəsiyyətnaməsində mənzilini və himayəsindəki yetim qızı Vladimirə tapşırır. Arxipovun gözləntilərinin əksinə olaraq, həmin qız yetkin və cazibədar Maşa çıxır.

Tezliklə qonşunun evi birbaşa Maşaya niyə qoymadığı sual doğurur. Məlum olur ki, bu mənzilə «Sevincə doğru yol» adlı təriqət üzvləri göz dikibmiş. Vəziyyət Maşanın əyalətdən gələn ögey qardaşının peyda olması və ardınca hər ikisinin yoxa çıxması ilə daha da qəlizləşir. Qonşunun şübhəli vəfatından və gənclərin itkin düşməsindən narahat olan Arxipov müstəqil şəkildə araşdırmaya başlayır.

«Qüsurlar və onların pərəstişkarları» («Пороки и их поклонники») kriminal serialı rejissor Vladimir Popkov tərəfindən lentə alınıb. Rusiya istehsalı olan bu ekran işi 2006-cı ildə yayımlanıb. Baş rolları Vladislav Qalkin, Qalina Polskix, İqor Yasuloviç və Olqa Volkova canlandırıb.