Nəfəsini necə aldığını bilirəm

Prokuror Nevena Murtaziç intihar etmiş gənc məktəblinin ölümü ilə bağlı açılan işin araşdırmasına rəhbərlik edir. Həyatına qəsd edən yeniyetmə baş qəhrəmanın on yeddi yaşlı oğlu Dinonun təhsil aldığı məktəbdə oxuyurdu. İstintaq tələsmədən və çətinliklərlə irəliləyir.

İşin ləng getməsindən qəzəblənən mərhumun atası mətbuat vasitəsilə ictimaiyyətə müraciət edir. O, övladını intihar həddinə çatdırmaqda günahlandırdığı yeniyetmələrin adlarını açıqlayır. Bu siyahıda prokurorun doğma oğlu Dinonun da adının olması hadisələrin gedişatını tamamilə dəyişir.

Bosniya və Herseqovina istehsalı olan «Znam kako dises» adlı kriminal dram serialı 2023-cü ildə işıq üzü görüb. Layihənin rejissor kürsüsünü Alen Drlyeviç və Nermin Hamzagiç bölüşüb, əsas rolları isə Yasna Curiçiç, Lazar Draqoyeviç, Ermin Bravo və Mirvad Kuriç canlandırıblar.