Ölümsüz

Nyu-York polisinin xəfiyyəsi Con Amsterdam dörd yüz ildir ki, qocalmır. O, bu xüsusiyyəti hələ 1642-ci ildə yerli hindu qızını ölümdən xilas edərkən qazanıb. Həmin qız yaralı Conu sağaldaraq ona əbədi ömür bəxş etsə də, sehrin yalnız həqiqi məhəbbətini tapdıqdan sonra bitəcəyini bildirib. Uzun əsrlər boyu övladlarını və sevdiklərini itirən qəhrəman getdikcə tənha bir adama çevrilib.

İndiki dövrdə Amsterdam qətl hadisələrini araşdırır və onun sirrini yalnız caz klubu sahibi Omar bilir. Həmkarı Yeva Markezlə şübhəlini təqib edərkən Con qəfil ürək tutması keçirir və onu həkim Sara Dilleyn həyata qaytarır. Bu hadisədən sonra detektiv qədim tilsimin tezliklə qırıla biləcəyini başa düşür.

ABŞ istehsalı olan «Ölümsüz» (New Amsterdam) adlı fantastik dram serialı 2008-ci ildə işıq üzü görüb. Ekran əsərinin rejissorları Con Devid Koulz və Jan De Seqonzakdır, baş rolları isə Nikolay Koster-Valdau, Zuleyxa Robinson, Aleksi Qilmor və Stiven Makkinli Henderson canlandırıblar.